Бучку, при поточку, чом ся не розвиваш, (Двічі)
Молода дзевчино, чом си не заспіваш?
Ей, чом си не заспіваш?

Заспівала бим сой, лем не знаю яку, (Двічі)
Поди мя навчити, ти, дошнянский дяку.
Ей, ти, дошнянский дяку.

Заспівала бим си, миленький, о тобі, (Двічі)
Алес барз парадний позераш по собі.
Ей, позераш по собі.

Позерам, позерам, але не по собі, (Двічі)
Заглядів єм тебе, то иду ку тобі.
Ей, то иду ку тобі.

Буду тя просити і твою мамичку, (Двічі)
Жеби тя мі дали за файну женичку.
Ей, за файну женичку.

Бучку, при поточку, розвийся, розвийся, (Двічі)
Молода дзєвчино, видайся, видайся.
Ей, видайся, видайся.