На заграді черешенька,
Під облачком дві.
Моя мила, премилена, (Двічі)
Що то є тобі?

Я без тебе, мій шугаю,
Ходжу все смутна.
Вечер прийдеш, рано підеш, (Двічі)
Нич не повідаш?

Моя мила захворіла,
Не знам од чого.
Тепер буде повідала (Двічі)
На мя одного.

На кого бим повідала,
Як не на тебе.
Вечер пришов, рано пішов, (Двічі)
Не любиш мене.

Носив єс мі до постелі
Токайске вино.
Аби м дитя не хрестила (Двічі)
На твоє ймено.

Ходит Янчик по заграді,
Файні ґрат, співат.
А Ганічка — при колисці (Двічі)
Плаче, нарікат...