Снила са мі тамтой ночі новина, (Двічі)
Же ня жена в старим краю споминат.

Споминат ня она в тим старим краю, (Двічі)
А же од нєй на порцію питают.

А я не мам ани цента при собі, (Двічі)
Най закличе нотаруша ку собі.

А она так і сама уробила, (Двічі)
Нотаруша ку собі закликала.

Пан нотаруш, будьте такий ласкавий, (Двічі)
Напиште ви ку мойому мужові!

Напиште ви, най він приде додому, (Двічі)
Притулю ’го ку сердечку свойому.

Притулю і поцілую тристо раз, (Двічі)
Питам ся то: кельо тих пінязі маш?

— А я не мам лем тих десять таляри, (Двічі)
Бо я пропил в Гамериці з бабами.