ПИСАЛА НІ МОЯ ЖЕНА ЛИСТ З КРАЮ

Писала ні моя жена лист з краю,
Же уж од ней на порцію питают.
Она не ма ни гелера при собі,
Заволала нотаруша ід собі.
Она не ма ни гелера при собі,
Заволала нотаруша ід собі.

Пан нотаруш най отпишут мойому,
Жеби пришол з Гамерики додому.
Облаплю ’го сідем рази, а не раз:
— Повіч, мужу, кельо тих пінязі маш?
Облаплю ’го сідем рази, а не раз:
— Повіч, мужу, кельо тих пінязі маш?

— Не мам вельо, лем пару сто долярів
Бо мі решту в Гамериці зостали.
В Гамериці шумни дівки бивают,
Каждий вечур на шпацірку волают.
В Гамериці шумни дівки бивают,
Каждий вечур на шпацірку волают.

Каждий вечур на шпацірку волают,
Долярики з кишені стягают,
І я ходил даколи на шпацірку,
Бо я теж мал в Гамериці фраїрку.
І я ходил даколи на шпацірку,
Бо я теж мал в Гамериці фраїрку.