Я сой хвопец єден, мам фраїрок седем,
Єдну на неділю, а шіст на кождий ден. (Двічі)

Моя фраїречко, вивий мі перечко,
Зелене, червене, бо ся розійдеме. (Двічі)

Прийшла неділечка — я не мам перечка,
Бо мі го не дава моя фраїречка. (Двічі)

Не дава, не дава, але обіцява,
Як червена ружа буде преквитава. (Двічі)

Квитне ружа, квитне, а квіту не має,
Хто не закоханий, тот жалю не знає. (Двічі)

Хто не закоханий, не буде мав жалю,
Хоц помашерує до чужого краю. (Двічі)